കളിപ്പാട്ടങ്ങള്‍ കുട്ടികള്‍ക്ക് രസം പകരാനുള്ളവയാണെന്ന് മാത്രമാണ് പല അച്ഛനമ്മമാരും ചിന്തിക്കുന്നത്. ചിലര്‍ക്കാവട്ടെ, കുട്ടിയുടെ വാശിയും, കരച്ചിലും അടക്കാനുള്ള എളുപ്പവഴിയാണ് കളിപ്പാട്ടം വാങ്ങിക്കൊടുക്കല്‍. പുതിയൊരു ടോയ് കിട്ടിയാല്‍ അതുമായി കളിച്ച് കുട്ടി കുറെ നേരമിരിക്കുമല്ലോ, ശല്യം കുറയുമല്ലോ എന്ന സമാധാനം.
എന്നാല്‍ കളിപ്പാട്ടങ്ങളുമായി പെരുമാറുന്നതിലൂടെ കുട്ടിയുടെ വളര്‍ച്ചയും, വികാസവുമാണ് സംഭവിക്കുന്നത്. ബുദ്ധിപരവും, വൈകാരികവുമായ വികാസം, മോട്ടോര്‍ സ്കില്‍സ്, പ്രശ്നങ്ങള്‍ പരിഹരിക്കാനുള്ള കഴിവ്, ചില പ്രത്യേക മേഖലകളിലുള്ള അവരുടെ അഭിരുചികള്‍…ഇങ്ങനെ എല്ലാം വളര്‍ത്തിയെടുക്കാന്‍ കളിപ്പാട്ടങ്ങള്‍ സഹായിക്കുന്നു. യഥാര്‍ത്ഥത്തില്‍ ഒരു കൊച്ചുകുഞ്ഞ് ലോകത്തെ അറിയുന്നതും പഠിക്കുന്നതും പോലും കളിപ്പാട്ടങ്ങളിലൂടെയാണ്.
ഇതൊക്കെയാണെങ്കിലും ഏതു പ്രായത്തിലാണെങ്കിലും കുട്ടിക്ക് വേണ്ടി കളിപ്പാട്ടം വാങ്ങുമ്പോള്‍ അത് അപകടങ്ങള്‍ക്ക് വഴിയൊരുക്കരുതെന്ന ജാഗ്രത വേണം. ലോകമെമ്പാടുമായി കളിപ്പാട്ടങ്ങള്‍ മൂലം പ്രതിവര്‍ഷം ഏകദേശം ഒരു ലക്ഷത്തി അറുപതിനായിരത്തോളം അപകടങ്ങള്‍ നടക്കുന്നു എന്നാണു കണക്കുകള്‍. ഇതില്‍ ചിലത് മാരകമായ അപകടങ്ങളുമാണ്. ചെറിയ ടോയ് ഭാഗങ്ങള്‍ വിഴുങ്ങുക, ചരടുകൊണ്ട് കഴുത്ത് മുറുകുക, മുനയുള്ള ഭാഗങ്ങള്‍കൊണ്ട് മുറിവേല്‍ക്കുക തുടങ്ങി പല അപകടങ്ങളും സംഭവിക്കാറുണ്ട്. അതുകൊണ്ട് കുട്ടിക്കായി ഒരു കളിപ്പാട്ടം കയ്യിലെടുക്കുമ്പോള്‍ അപകടസാധ്യതയുണ്ടോ എന്ന് ചിന്തിക്കണം. കുട്ടികള്‍ ടോയ്സ് വലിച്ചെറിയാറുണ്ട്. അങ്ങനെ എറിയുമ്പോള്‍ പൊട്ടി അപകടമുണ്ടാകുന്ന തരത്തിലുള്ള കളിപ്പാട്ടങ്ങളും ഒഴിവാക്കണം.
നിറങ്ങള്‍ ഇളകിപോകുന്ന തരാം ടോയ്സ് വാങ്ങരുത്. കുട്ടികള്‍ ടോയ്സ് വായില്‍ വെച്ചാല്‍ പെയിന്റിന്റെ വിഷാംശം വയറ്റില്‍ ചെന്ന് അപകടമുണ്ടാക്കും. വിലകുറഞ്ഞ പ്ലാസ്റ്റിക് ടോയ്സ് വാങ്ങരുത്. അതുപോലെ സ്റ്റഫ്ഡ് ടോയ്സ് വാങ്ങുമ്പോള്‍ നൂലും, നാരുകളും മറ്റും കുട്ടിയ്ക്ക് അലര്‍ജിയുണ്ടാക്കുന്നതാവരുത്. ടെഡി ബിയറും, പാവകളും വാങ്ങുമ്പോള്‍ ഗുണനിലവാരമുള്ളതായിരിക്കാന്‍ പ്രത്യേകം ശ്രദ്ധിക്കുക.
ഭയങ്കര ശബ്ദമുണ്ടാക്കുന്ന ഇലക്ട്രോണിക് ടോയ്സ് കുട്ടികള്‍ക്ക് വാങ്ങി കൊടുക്കരുത്. കുട്ടികള്‍ ഇത് ചെവിയില്‍വെച്ച് ഉറക്കെ ശബ്ദമുണ്ടാക്കുന്നത് ഇയര്‍ ഡ്രമ്മിനു തകരാറു വരാന്‍ കാരണമായേക്കും. ഇളകിപ്പോകുന്ന ചെറിയ ഭാഗങ്ങളുള്ള കളിപ്പാട്ടങ്ങളും ചരടുകളുള്ള കളിപ്പാട്ടങ്ങളും തീര്‍ച്ചയായും ഒഴിവാക്കുക. ഇവയ്ക്ക് അപകടസാധ്യത വളരെ കൂടുതലാണ്. തീര്‍ച്ചയായും കുട്ടിയുടെ പ്രായം പരിഗണിച്ചുവേണം, കളിപ്പാട്ടം വാങ്ങാന്‍. അപ്പോള്‍ അപകടസാധ്യതയും കുറയും.
