നല്ല അമ്മയായിത്തീരുന്നത് അത്ര എളുപ്പമുള്ള കാര്യമല്ല. ഇന്നത്തെ കാലത്ത് പ്രത്യേകിച്ചും. എന്നാൽ നല്ല അമ്മയാകാൻ ബോധപൂർവ്വം ചില ശ്രമങ്ങളൊക്കെ നടന്നാൽ അതിൽ വിജയിക്കുകയും ചെയ്യും. മനശ്ശാസ്ത്രം പറയുന്നതനുസരിച്ച് നല്ല അമ്മയുടെ ലക്ഷണങ്ങൾ ഇവയാണ്.
നല്ല അമ്മ തന്നോടുതന്നെ അനുകമ്പയുള്ള വളാണ്. മറ്റുള്ളവരോട് കരുണ കാണിക്കാൻ മത്സരിക്കുന്ന പല സ്ത്രീകളും തങ്ങളോടുതന്നെ അനുകമ്പയുളളവരാകുന്നില്ലെന്നാണ് സൈക്കോതെറാപ്പിസ്റ്റായ മെലിസ വെയ്ൻബെർഗിന്റെ അഭിപ്രായം. തിരക്കിട്ട് ജോലി ചെയ്തും കുട്ടികളെ പരിപാലിച്ചും മുന്നോട്ടുപോകുന്നതിനിടയിൽ അവർ വിശ്രമിക്കാനോ തന്റെ സന്തോഷങ്ങൾക്കുവേണ്ടി സമയം കണ്ടെത്താനോ ശ്രമിക്കുന്നില്ല. കുറ്റബോധം, നഷ്ടബോധം, ആത്മനിന്ദ എന്നിവയൊക്കെ പല അമ്മമാരിലും കണ്ടുവരുന്നതായി മനശ്ശാസ്ത്രം പറയുന്നു.
നല്ല അമ്മയ്ക്ക് നല്ലതുപോലെ ആശയവിനിമ യം നടത്താനറിയാം. നല്ല അമ്മമാർ മക്കളുമായി നല്ലതുപോലെ ആശയവിനിമയം നടത്തുന്നവരാണ്. പക്ഷേ നിർഭാഗ്യകരമെന്ന് പറയട്ടെ പല അമ്മമാരും പരാജയപ്പെട്ടുപോകുന്ന ഒരു മേഖലയാണ് ഇത്. മക്കളുമായുള്ള ആശയവിനിമയത്തിൽ പരാജയപ്പെട്ടുപോകുന്നതുകൊണ്ടാണ് അമ്മ-മക്കൾ ബന്ധത്തിൽ സംഘർഷങ്ങൾ സൃഷ്ടിക്കപ്പെടുന്നത്.
നല്ല അമ്മമാർക്ക് മക്കളുമായി താദാത്മ്യംപ്രാപിക്കാനുള്ള കഴിവുണ്ട്. അവർ മക്കളെ കേൾക്കുന്നു, മനസ്സിലാക്കുന്നു. മക്കളുടെ വീക്ഷണകോണിലൂടെ അവരുടെ സ്ഥാനത്തുനിന്നുകൊണ്ട് പ്രശ്നം മനസ്സിലാക്കാനും പരിഹാരം നിർദേശിക്കാനും പ്രത്യേക കഴിവുണ്ട്.
വികാരങ്ങളെ നിയന്ത്രിക്കാൻ കഴിയുന്നവളാണ് നല്ല അമ്മമാർ. സമ്മർദങ്ങളോ സംഘർഷങ്ങളോ അവർക്ക് നേരിടേണ്ടിവരുന്നുണ്ട്. പക്ഷേ അതിനെ സമചിത്തതയോടെ നേരിടാൻ നല്ല അമ്മമാർക്ക് സാധിക്കുന്നു.
നല്ല അമ്മമാർ സുരക്ഷിതത്വം നല്കുന്നവളാണ്. അമ്മയ്ക്ക് നല്കുന്നത്ര സുരക്ഷിതത്വം ഈ ലോകത്ത് മറ്റൊരാൾക്കും നല്കാനാവില്ലെന്നാണല്ലോ പറയപ്പെടുന്നത്. അതു ശരിയുമാണ്. എന്നാൽ നല്ല അമ്മമാർ സുരക്ഷിതത്വത്തിന് ചില അതിരുകൾ കൂടി നിശ്ചയിച്ചിട്ടുണ്ടാവും. സ്വയംപര്യാപ്തതയോടെ മക്കൾ വളർന്നുവരുന്നതിനുള്ള എല്ലാ സാഹചര്യങ്ങളും അവർ ഒരുക്കിക്കൊടുക്കും.