ഏതൊരു ബന്ധത്തിലും-സുഹൃത്ത്ബന്ധം, ദാമ്പത്യബന്ധം, സഹപ്രവർത്തകർ തമ്മിലുള്ള ബന്ധം, അയൽപക്കബന്ധം- അടിസ്ഥാനമായിട്ടുള്ള ഒരു ഘടകമുണ്ട്. പ്രതിപക്ഷ ബഹുമാനം. നിർദ്ദോഷമായ തമാശുകൾ മാറ്റിനിർത്തിയാൽ മറ്റൊരാളോട് തികഞ്ഞ ആദരവോടും ബഹുമാനത്തോടും കൂടി മാത്രമേ സംസാരിക്കുകയും ഇടപെടുകയും ചെയ്യാവൂ. ഇതിന് പകരമായി എപ്പോഴും ബഹുമാനമില്ലാതെയും പുച്ഛിച്ചും പരിഹസിച്ചും സംസാരിക്കുന്നവരാണ് ചുറ്റുമെങ്കിൽ ജീവിതം ദുഷ്ക്കരമാകും.അംഗീകരിക്കപ്പെടുകയോ ബഹുമാനിക്കപ്പെടുകയോ ചെയ്യുന്നതിന് പകരം തുടർച്ചയായി പരിഹസിക്കപ്പെടുകയും അവഗണിക്കപ്പെടുകയും മാറ്റിനിർത്തപ്പെടുകയുമാണ് ചെയ്യുന്നതെങ്കിൽ അത്തരക്കാരുമായുള്ള ബന്ധം വിച്ഛേദിക്കുന്നതാണ് നല്ലത്.
ആത്മാർത്ഥമായി സ്നേഹിക്കുകയും വിശ്വസ്തതപുലർത്തുകയും ചെയ്തിട്ടും മറ്റൊരു വ്യക്തിയെ ചൂണ്ടിക്കാട്ടി ആ വ്യക്തിയുടെ നന്മകൾ പറയുകയും അയാളാണ് നിന്നെക്കാൾ ഭേദമെന്ന് സ്ഥാപിക്കുകയും ചെയ്യുന്ന ബന്ധങ്ങളും നമുക്ക് നല്ലതിന് വേണ്ടിയല്ല. നിന്നെക്കാൾ ആ വ്യക്തി സ്നേഹിക്കുന്നത് മറ്റെയാളെയാണെന്നാണ് അതിന്റെ അർത്ഥം. നീ നിക്ഷേപിച്ച സ്നേഹവും സൗഹൃദവും പോലും നിനക്ക് തിരികെകിട്ടുന്നില്ലെങ്കിൽ ആത്മനിന്ദ അനുഭവിച്ചുകൊണ്ട് എന്തിന് ആ ബന്ധം തുടരണം?
വിശ്വാസമാണ് ബന്ധങ്ങളുടെ സൗന്ദര്യം നിശ്ചയിക്കുന്നത്. സുഹൃത്തോ ജീവിതപങ്കാളിയോ അയൽക്കാരോ ആരുമായിരുന്നുകൊള്ളട്ടെ പരസ്പര വിശ്വാസമുണ്ടായിരിക്കണം. വിശ്വസിച്ച് പറഞ്ഞ കാര്യങ്ങൾ മറ്റുള്ളവരോട് പരസ്യപ്പെടുത്തുന്നവരോ വിശ്വസിച്ച ഏല്പിച്ചവ ദുരുപയോഗിക്കുകയോ ചെയ്യുന്നവരുമായുള്ള ബന്ധം സ്വയം വിഡ്ഢികളാക്കുകയേയുള്ളൂ.
ഏതുകാര്യത്തിനും എന്തിനും എപ്പോഴും നുണ പറയുന്നവരുണ്ട്. നമ്മോട് അടുത്ത് ഇടപഴകുന്നവരോട് സത്യസന്ധതപുലർത്തുക. ഈ ലോകത്തിലെ ഏറ്റവും മികച്ച നയമാണ് സത്യസന്ധത. സത്യസന്ധത പുലർത്താരിക്കുകയും സത്യംപറയാതിരിക്കുകയും ചെയ്യുന്നവരുമായുളള ബന്ധം നിനക്കെന്ത് നന്മയാണ് വരുത്തുന്നത്? നന്മയുണ്ടാവില്ലെന്ന് മാത്രമല്ല തിന്മ ഉണ്ടാവാനും സാധ്യതയുണ്ട്.
ബന്ധങ്ങളിൽ പരസ്പരം ആസ്വദിക്കാൻ കഴിയു ന്ന ഒരു പൊതുഘടകമെങ്കിലും ഉണ്ടായിരിക്കണം. ഓരോ വ്യക്തികളും വ്യത്യസ്തരാണ്, വ്യത്യസ്ത താല്പര്യങ്ങളും അഭിരുചികളും ഉള്ളവരുമാണ്. അതൊക്കെ അംഗീകരിക്കുമ്പോൾതന്നെ ബന്ധ ത്തിന്റെ സുഗമമായ വളർച്ചയ്ക്കും നിലനില്പിനും രണ്ടുകൂട്ടർക്കും യോജിച്ചുപോകാൻ കഴിയുന്ന ചില പൊതുതാല്പര്യങ്ങൾ ഉണ്ടായിരിക്കണം. ഇതിന് പകരമായി വിരുദ്ധമായ ആശയങ്ങളും താല്പര്യങ്ങളുമാണ് ഇരുവർക്കുമുള്ളതെങ്കിൽ ആ ബന്ധം ശാശ്വതമായിരിക്കുകയില്ല. അത് മനസ്സിലാക്കി ഇത്തരം ബന്ധങ്ങളിൽ നിന്ന് സ്വമേധയാ വിട്ടുനില്ക്കുകയാണ് നല്ലത്.
ചിലർക്ക് അവരുടെ കാര്യം മാത്രമേ പ്രധാനപ്പെട്ടതാകുന്നുള്ളൂ. തന്റെ കാലിൽ തറച്ച മുള്ളിന്റെ വേദനയായിരിക്കും കാൽ മുറിച്ചുമാറ്റിയ മറ്റേ ആൾ അനുഭവിക്കുന്ന വേദനയെക്കാൾ ഇക്കൂട്ടർക്ക് വലു ത്. മറ്റുള്ളവരോട് അനുകമ്പയോ സഹതാപമോ ഐകദാർഢ്യമോ ഇവർക്ക് ഉണ്ടായിരിക്കുകയില്ല. എന്റെ വേദന വലുത്, എന്റെ സന്തോഷം വലുത്, എന്റെ വിജയം പ്രധാനം… ഇങ്ങനെ എല്ലാറ്റിലും ഞാൻ അധികമായി കടന്നുവരികയും മറ്റേ ആളുടെ വേദനകളോ പ്രയാസങ്ങളോ ഗൗനിക്കുകപോലും ചെയ്യാതിരിക്കുകയും ചെയ്യുന്നവരുമായും ബന്ധം സ്ഥാപിക്കാൻ ശ്രമിക്കാതിരിക്കുക.
ഏതു സാഹചര്യത്തിലായാലും ബോഡി ഷെയിമിങ് തെറ്റായ സമീപനമാണ്. ഓരോരുത്തരും വ്യത്യസ്ത സൃഷ്ടികളാണ്. ഉയരം, നിറം, തൂക്കം, ആകാരം, മുഖം, അവയവങ്ങൾ ഇങ്ങനെ പലകാര്യങ്ങളിലും എല്ലാവരും ഒന്നിനൊന്ന് വ്യത്യസ്തരാണ്. ഈ വ്യത്യസ്തതയെ അംഗീകരിക്കാതെ ശരീരസൗന്ദര്യ ത്തിന്റെ പേരിൽ അപമാനിക്കുന്ന വിധത്തിൽ സംസാരിക്കുന്നവരുമായും ബന്ധം ആവശ്യമില്ല. നമ്മെ അപകർഷതയിലേക്ക് തള്ളിയിടുന്ന ഒരാളുമായും ബന്ധം പുലർത്താതിരിക്കുക. ചില ബന്ധങ്ങൾക്ക് നല്കാൻ കഴിയുന്ന ആശ്വാസവും സന്തോഷവുമുണ്ട്. അവരുടെ കൂടെയായിരിക്കുമ്പോൾ നാം വല്ലാത്തൊരുരക്ഷിതകവചത്തിലായിരിക്കുന്നതുപോലെയുള്ള ഫീലിംങ് അനുഭവപ്പെടും. അവരുടെ സാന്നിധ്യം അത്രയേറെ നമ്മെ കംഫർട്ട് ആക്കുന്നു. ഇത്തരത്തിലുള്ള സാമീപ്യവും സാന്നിധ്യവും നമ്മെ ആകർഷിക്കുന്നുണ്ടെങ്കിൽ അവരുമായി കൂടുതൽ ചേർന്നുനില്ക്കുക. അതിന് പകരം ചില ബന്ധങ്ങൾ നെഗറ്റീവ് ഫലമാണ് തരുന്നതെങ്കിൽ അവരിൽ നിന്ന് ഓടിരക്ഷപ്പെടുക.