ദാമ്പത്യത്തിൽ വഴക്കുണ്ടാകുക സാധാരണം. പക്ഷേ എപ്പോൾ വഴക്കുണ്ടായാലും അതിനെല്ലാം കാരണം മറ്റേ ആൾ മാത്രമാണെന്ന് സ്ഥാപിച്ചെടുക്കാൻ പങ്കാളി ശ്രമിക്കുന്നുണ്ടോ? എന്റെ ഭാഗത്ത് ഒരു തെറ്റുമില്ല തെറ്റെല്ലാം പങ്കാളിയുടേത്. ഇതാണ് അവരുടെ മട്ട്. സ്വന്തം കുറ്റങ്ങളെ ബോധപൂർവ്വം മറച്ചുവയ്ക്കുകയും പങ്കാളിയെ എപ്പോഴും പ്രതിസ്ഥാനത്ത് ചേർക്കുകയും ചെയ്യുന്ന ഇത്തരം രീതി തെല്ലും ആരോഗ്യകരമല്ല. പതിവായി ഇത്തരം ആരോപണങ്ങൾക്ക് വിധേയരാകുന്നത് ഭാര്യയോ ഭർത്താവോ ആരുമായിരുന്നുകൊള്ളട്ടെ അവർക്ക് ക്രമേണ തങ്ങളിൽ തന്നെ സംശയവും ആശയക്കുഴപ്പവും ഉടലെടുക്കുകയും ചെയ്യും.
പങ്കാളിക്കെതിരെ അകാരണമായി ആരോപണങ്ങൾ ഉന്നയിക്കുന്ന വ്യക്തികളെ അല്പം അകന്നു നിന്ന് വിലയിരുത്തുകയും വീക്ഷിക്കുകയുമാണെങ്കിൽ മനസ്സിലാകുന്ന ഒരു കാര്യമുണ്ട്. അവർ ആരോപിക്കുന്ന കുറ്റങ്ങളെല്ലാം അവരുടെതന്നെ കുറ്റങ്ങളാണ്. സ്നേഹമില്ലെന്നോ പരിഗണനയില്ലെന്നോ തുടർച്ചയായി പങ്കാളിയെക്കുറിച്ച് കുറ്റം ആരോപിക്കുന്ന വ്യക്തി യഥാർത്ഥത്തിൽ സ്നേഹമില്ലാത്തതും പങ്കാളിയെ പരിഗണിക്കാത്തതുമായ വ്യക്തിയായിരിക്കും. തന്റെ കുറവുകൾ മറച്ചുവയ്ക്കാൻ ശ്രമിക്കുന്നതിന്റെ ഭാഗമായാണ് അവർ ഇങ്ങനെയുളള ആരോപണങ്ങൾ ഉന്നയിക്കുന്നത്. ജീവിതപങ്കാളിയുടെ മേൽ സംശയം വച്ചുപുലർത്തുന്നവരും സ്വഭാവഹത്യ നടത്തുന്നവരും ചിലരെങ്കിലും തെളിവില്ലാതെയുള്ള ആരോപണങ്ങൾ ഉന്നയിക്കുന്നവരാണ്.
പങ്കാളിയിൽ നിന്നുളള അകാരണവും നിരന്തരവുമായ കുറ്റാരോപണങ്ങൾ കേട്ട് മനസ്സ് തളർന്ന ഒരുപാടുപേർ നമുക്കു ചുറ്റിനുമുണ്ട്. അസ്വസ്ഥകരമായ അത്തരം ബന്ധത്തിൽ തുടരുന്നതുമൂലം അവരുടെ മാനസിക നില പോലും ക്രമേണ തകരാറിലാവും. അതുകൊണ്ട് ഇത്തരം സൂചനകൾ ആവർത്തിക്കുമ്പോൾ തിരുത്താനും മുൻകരുതലുകളെടുക്കാനും തയ്യാറാവണം.
യഥാർത്ഥമായ സ്നേഹബന്ധത്തിലേക്കും ദൃഢമായ വ്യക്തിബന്ധത്തിലേക്കുമാണ് വളരാൻ ശ്രമിക്കുന്നതെങ്കിൽ ആദ്യം അവസാനിപ്പിക്കേണ്ടത് പഴിചാരലും കുറ്റം കണ്ടുപിടിക്കലുമാണ്. മറ്റെയാളെ തിരുത്താൻ പോകുന്നതിന് മുമ്പ് ആദ്യം സ്വയം തിരുത്തിക്കാണിക്കൂ.
സ്ഥിരമായി ഒരാൾ മാത്രം കുറ്റക്കാരനും സ്ഥിരമായി ഒരാൾ മാത്രം കുറ്റവിമുക്തനുമാകുന്ന രീതി ദാമ്പത്യബന്ധത്തിൽ എന്നല്ല ഒരു ബന്ധത്തിലും നല്ലതല്ല എന്നുകൂടി ഓർമ്മിക്കണം.
