ടോപ് അപ്

കടയിൽ പോകാൻ അമ്മ തന്ന നൂറുരൂപ കൊണ്ട്
മൊബൈൽ ടോപ് അപ് ചെയ്തു
അല്ല, ചെയ്തുപോയി.
കാശില്ലാരുന്നെടേ എന്ന
ക്ഷമാപണത്തോടെ തുടങ്ങി
ലാലേട്ടന്റെ പുതിയ സിനിമയുടെ
വിശദമായ ഒരു റിവ്യൂ അനിലിന്
സെക്കന്റ് ഇയർ കെമിസ്ട്രിയിലെ
മായയുടെ പുതിയ നമ്പരിൽ
പ്രണയത്തിൽ പൊതിഞ്ഞ
രണ്ട് എസ്.എം.എസ്
ഒടുവിൽ ബാലൻസ് നോക്കിയപ്പോൾ
സ്‌ക്രീനിൽ തെളിഞ്ഞത് ഒറ്റസംഖ്യ
ഒപ്പം
വെയിലേൽക്കാതെ തലയിൽക്കെട്ടുന്ന
അമ്മയുടെ തോർത്തിൽ ഇഷ്ടികക്കളത്തിലെ
ചുവന്ന പൊടി
അനുജത്തിയുടെ തുരുമ്പിച്ച കുടയിലെ
പത്തു തുന്നലുകൾ…
കൈ അറിയാതെ പോക്കറ്റിൽ പരതി
അരി ഒരുകിലോ, മുളക് നൂറ്, കടുക്…
തുണ്ടുകടലാസ് ചുരുട്ടിയിട്ടത്
ഇരുട്ട് വീണുതുടങ്ങിയ റോഡിൽ
എന്നാലെന്ത്
മൊബൈലിൽ ടോർച്ചുള്ളതുകൊണ്ട്
തട്ടിവീഴാതെ നടക്കാമല്ലോ

പി ഹരികൃഷ്ണൻ