ഗ്രീസിലെ മാജിക്കൽ ഐലന്റാണ് സാന്റോറിനി.ലോകത്തിലെ തന്നെ ഏറ്റവും പ്രശസ്തമായ ദ്വീപസമൂഹവും. ബിസി പതിനാറാം നൂറ്റാണ്ടിന് മുമ്പുണ്ടായ അഗ്നിപർവ്വത സ്ഫോടനത്തെതുടർന്ന് ഏജിയൻ കടലിൽ രൂപമെടുത്തതാണ് സാന്റോറിനി. ക്രൗൺ ഓഫ് ജ്യൂവൽസ് എന്നാണ് സാന്റോറിനി അറിയപ്പെടുന്നത്. ലോകത്തിലെ ടോപ്പ് ഹണിമൂൺ സ്പോട്ട് കൂടിയാണ് സാന്റോറിനി.
മനോഹരമായ ബീച്ചുകളും അപൂർവ്വസൗന്ദര്യമുള്ള പ്രകൃതിയും ചരിത്രഗന്ധം ഉണർത്തുന്ന നഗരങ്ങളുമാണ് സാന്റോറിനിയുടെ പ്രത്യേകത. ബീച്ചുകളുടെ വൈവിധ്യത്തിന്റെ പേരിലും ഇവിടം ശ്രദ്ധേയമാകുന്നു. സാന്റോറിനിയിൽ പ്രധാനപ്പെട്ട ആറു ബീച്ചുകളാണ് ഉള്ളത്. അഗ്നിപർവ്വതങ്ങളുടെ പ്രവർത്തനഫലമായി രൂപം കൊണ്ട റെഡ് ബീച്ച്, വൈറ്റ് ബീച്ച്, എന്നിവയാണ് ഇതിൽ മുഖ്യം. റെഡ് ബീച്ചിന് സമീപത്തു തന്നെയാണ് വൈറ്റ് ബീച്ച്. ആസ്പ്രി പരാലിയ എന്നും ഇതിന് പേരുണ്ട്. കമാരി ബീച്ചാണ് മറ്റൊന്ന്. കറുത്ത മണൽത്തരികളോടു കൂടിയതാണ് ഇവിടം, സ്ഫടികസമാനമാണ് വെള്ളം.
ലോകത്തിലെ തന്നെ ഏറ്റവും മികച്ച വൈൻ കിട്ടുന്ന സ്ഥലവും ഇവിടെയാണ്. റോമാചരിത്രം കാലം മുതൽ തന്നെ വൈൻ നിർമ്മാണത്തിൽ ഇവർ മുമ്പന്തിയിലായിരുന്നു. ഫിറയാണ് തലസ്ഥാനം. വെള്ള പൂശിയ കെട്ടിടങ്ങളാണ് ഇവിടത്തെ ഒരു പ്രത്യേകത. ആർക്കിയോളജിക്കൽ മ്യൂസിയം, ദേവാലയങ്ങൾ, ആശ്രമങ്ങൾ എന്നിവയുമുണ്ട്.