എങ്ങിനെ ലോക്കോ പൈലറ്റാവാം

വീമാനം പറത്തുന്ന വൈമാനികനെ പൈലറ്റ് എന്നു വിളിക്കുന്നതു പോലെ, തീവണ്ടിയോടിപ്പിക്കുന്നയാളാണ് ലോക്കോ പൈലറ്റ്. സ്ത്രീകൾക്കടക്കം ശോഭിയ്ക്കാവുന്ന ഒരു ജോലി മേഖല കൂടിയാണ്, ലോക്കോ പൈലറ്റിന്റേത്.മണിക്കൂറുകളോളം തുടർച്ചയായി ജോലി ചെയ്യുന്നതിനുള്ള ശാരീരിക ക്ഷമതയും കാഴ്ചശക്തിയുമുള്ള നിർദ്ദിഷ്ട യോഗ്യതക്കാർക്ക് അപേക്ഷിക്കാം.
അടിസ്ഥാന യോഗ്യത:റെയിൽവേയിൽ അസിസ്റ്റന്റ് ലോക്കോ പൈലറ്റ് ജോലിക്കപേക്ഷിക്കാൻ, മെട്രിക്കുലേഷൻ/എസ്.എസ്.എൽ.സി നിർബന്ധമായും വേണം. ഒപ്പം, നിശ്ചിത ട്രേഡിൽ, എൻ.സി വി.ടി/എസ്.സി.വി.ടി അംഗീകൃത, ഐ.ടി.ഐ. യോഗ്യത ഉണ്ടാവണം. അല്ലെങ്കിൽ, ആ ട്രേഡിലെ ‘കോഴ്സ് കംപ്ലീറ്റഡ് ആക്ട് അപ്രന്റീസ്ഷിപ്പ്’ യോഗ്യതയുള്ളവരേയും പരിഗണിക്കും. നിർദിഷ്ട വിഷയങ്ങളിൽ ഡിപ്ലോമയോ എഞ്ചിനീയറിംഗ് ബിരുദമോ ഉള്ളവർക്കും റെയിൽ നോട്ടിഫിക്കേഷൻ വരുമ്പോൾ അപേക്ഷിക്കാവുന്നതാണ്.

ഏതൊക്കെ ട്രേഡുകാർക്ക് ലോക്കോ പൈലറ്റാകാം:
ഇലക്ട്രീഷ്യൻ/ ഇലക്‌ട്രോണിക്സ് മെക്കാനിക്/ ഫിറ്റർ/ ഹീറ്റ് എഞ്ചിൻ/ ഇൻസ്ട്രുമെന്റ് മെക്കാനിക്ക് /മെഷിനിസ്റ്റ് / മെക്കാനിക് ഡീസൽ/മെക്കാനിക് മോട്ടോർ വെഹിക്കിൾ/മിൽ റൈറ്റ് മെയിൻറനൻസ് മെക്കാനിക് /മെക്കാനിക് റേഡിയോ & ടി വി/റഫ്റ്രിജറേഷൻ & എയർ കണ്ടീഷനിംഗ് മെക്കാനിക്/ട്രാക്ടർ മെക്കാനിക്/ടേർണർ/ വയർമാൻ / ആർമേച്ചർ & കോയിൽ വൈൻഡർ എന്നിവർക്കും മെക്കാനിക്കൽ/ഇലക്ട്രിക്കൽ/ ഇലക്ട്രോണിക്സ്/ഓട്ടോമൊബൈൽ എഞ്ചിനീയറിംഗിൽ ത്രിവത്സര ഡിപ്ലോമയോ എഞ്ചിനീയറിംഗ് ബിരുദമോ ഉള്ളവർക്കും അപേക്ഷിക്കാവുന്നതാണ്.

പരീക്ഷാപരിശീലനം :
കോഴിക്കോടും തിരുവനന്തപുരവും കേന്ദ്രീകരിച്ച്‌, റെയിൽവെ യിലെ വിവിധ പരീക്ഷകൾക്കുള്ള പരിശീലന സ്ഥാപനങ്ങളുണ്ട്.ഹൈദരാബാദ്, സെക്കന്തരാബാദ് കേന്ദ്രീകരിച്ച്, രാജ്യാന്തര നിലവാരമുള്ള പരിശീലന സ്ഥാപനങ്ങളുമുണ്ട്.