സോഷ്യല്‍ മീഡിയ കഴിഞ്ഞ ദിവസങ്ങളിലായി കൊണ്ടാടിയത് ഫേസ് ആപ്പ് എന്ന മൊബൈല്‍ ആപ്ലിക്കേഷനാണ്. സെലിബ്രിറ്റികളാണ് ഇതിനെ വൈറലാക്കിയത്. പ്രായമാകുമ്പോള്‍ തങ്ങളുടെ രൂപം എങ്ങനെയായിരിക്കും എന്നാണ് ഇതിലൂടെ അവരോരുത്തരും കാണിച്ചുതന്നത്.
മലയാളത്തില്‍ നിന്ന് ടൊവിനോ, കുഞ്ചാക്കോ ബോബന്‍, കാളിദാസ് ജയറാം,വിനയ് ഫോര്‍ട്ട്, മഞ്ജുവാര്യര്‍ തുടങ്ങിയവരാണ് ഫേസ് ആപ്പ് ചലഞ്ച് ഏറ്റെടുത്ത് അമ്പരപ്പ് സൃഷ്ടിച്ചത്. പെട്ടെന്നൊരു നിമിഷം കൊണ്ട് സോഷ്യല്‍ മീഡിയായില്‍ തങ്ങളുടെ ഇഷ്ടതാരങ്ങളുടെ പ്രായം ചെന്ന രൂപങ്ങള്‍ കണ്ട് ആരാധകര്‍ അമ്പരന്നുപോയിരുന്നു. പിന്നെയാണ് ഫേസ് ആപ്പ് ആണ് ഇതിന് പിന്നിലെന്ന് മനസ്സിലായത്.
ഇതില്‍ ആദില്‍ ഇബ്രാഹിമിന്റെ ഫേസ് ആപ്പ് കുറെക്കൂടി രസകരമായി. മമ്മൂട്ടിക്കൊപ്പം പ്രായമായ താന്‍ നില്ക്കുന്ന ചിത്രം ഷെയര്‍ ചെയ്തുകൊണ്ട് ആദില്‍ കുറിച്ചത് ആണ് രസകരമായത്. തനിക്ക് പ്രായമായാലും മറ്റേ ആള്‍ക്ക് ഒരിക്കലും പ്രായം കൂടില്ല എന്നായിരുന്നു ആദിലിന്റെ കുറിപ്പ്.
