ഒരു വ്യക്തിയോട് സ്നേഹം തോന്നുന്നതും ആകർഷണം തോന്നുന്നതും തമ്മിൽ എന്തെങ്കിലും സാമ്യമുണ്ടോ? അതോ വ്യത്യാസമുണ്ടോ? ബന്ധങ്ങളുടെ വ്യത്യസ്തതലങ്ങളെ പ്രതിനിധാനം ചെയ്യുന്ന തികച്ചും വിഭിന്നമായ അർത്ഥത്തിൽ പ്രയോഗിക്കുന്ന രണ്ടുവാക്കുകളാണ് ഇവ. ഈ വാക്കുകൾക്ക് തമ്മിൽ പ്രകടമായ വ്യത്യാസമുണ്ടെന്ന് മനസ്സിലാക്കുകയാണ് ആദ്യം വേണ്ടത്. ഇവ തമ്മിലുള്ള അന്തരം വിശദീകരിക്കുമ്പോൾ സ്നേഹവും ആകർഷണവും തമ്മിൽ വേർതിരിച്ചറിയാനാവും.
സ്നേഹം ശാശ്വതമായി നില്ക്കുന്ന ഒരു വികാരമാണ്. ഒരു തീരുമാനവും ഉറപ്പുമാണ് അത്. എന്നാൽ ആകർഷണം നൈമിഷികമാണ്. അതിന് ആഴമോ പരപ്പോ കാണുകയില്ല. സ്നേഹിക്കുന്ന വ്യക്തിയോട് കരുതലും അനുകമ്പയും പ്രതിബദ്ധതയുമുണ്ടാവും. സ്നേഹിക്കുന്ന വ്യക്തിയോട് വൈകാരികമായ അടുപ്പവും അതിനുമപ്പുറം ശാരീരികമായ അടുപ്പവും തോന്നിയേക്കാം. എന്നാൽ ആകർഷണം തോന്നുന്ന വ്യക്തിയോട് നീണ്ടുനില്ക്കുന്ന ബന്ധം ഉണ്ടാവണമെന്നില്ല. താല്ക്കാലികമായ ബന്ധം മാത്രമാണ്അവിടെ സംഭവിക്കുന്നത്. അതുകൊണ്ടുതന്നെ സ്ഥിരമായ സ്നേഹവും അവിടെയുണ്ടാവുകയില്ല.
ആശയവിനിമയം, ആശയപ്പൊരുത്തം, സമാനമായ ചിന്താഗതി, അഭിപ്രായൈക്യം എന്നിങ്ങനെ പലവിധ ഘടകങ്ങൾ ചേർന്നാണ് രണ്ടുവ്യക്തികളുടെ സ്നഹബന്ധം സ്ഥാപിതമാകുന്നത്. എന്നാൽ ആകർഷണം തോന്നുന്നത് ബാഹ്യഘടകങ്ങളെ മുൻനിർത്തി മാത്രമാണ്. സ്നേഹം മറ്റൊരാളുടെ നന്മയും വളർച്ചയും ലക്ഷ്യമാക്കുന്നു. നിസ്വാർത്ഥമായാണ് സ്നേഹം ഇടപെടുന്നത്. എന്നാൽ ആകർഷണത്തിൽ മറ്റെ വ്യക്തിയുടെ വളർച്ചയോ ഉയർച്ചയോ നന്മയോ പരിഗണിക്കപ്പെടുന്നില്ല.തന്റെ സ്വാർത്ഥതയും ലക്ഷ്യങ്ങളും മാത്രമാണ് ആകർഷണത്തിന്റെ അടിസ്ഥാനം. ആയിരിക്കുന്ന അവസ്ഥയിൽ സ്വീകരിക്കാനുളള സന്നദ്ധതയാണ് സ്നേഹം. വ്യക്തിയുടെ നന്മയും തിന്മയും ഒരുപോലെ അവിടെ ഉൾക്കൊള്ളുന്നു. ആദർശപരതയിൽ അധിഷ്ഠിതമാണ് ആകർഷണം. ഉപരിപ്ലവമായ ചിന്താഗതികളാണ് അവിടെ നിലനില്ക്കുന്നത്. ആകർഷണം എപ്പോൾ വേണമെങ്കിലും മങ്ങിപ്പോകാം, നഷ്ടപ്പെടാം. പക്ഷേ യഥാർഥ സ്നേഹം വെല്ലുവിളികളിലൂടെ കടന്നുപോകുമ്പോഴും നഷ്ടപ്പെട്ടുപോകുകയില്ല. പ്രണയബന്ധങ്ങളിലും സുഹൃദ്ബന്ധങ്ങളിലും ദാമ്പത്യബന്ധങ്ങളിലുമെല്ലാം സ്നേഹവും ആകർഷണവുമുണ്ട്. പക്ഷേ അവയെ രണ്ടുരീതിയിൽ വിലയിരുത്തുകയാണ് വേണ്ടത്.
ഇനി പറയൂ നിങ്ങളുടേത് സ്നേഹമാണോ ആകർഷണമാണോ.. നിങ്ങൾക്ക് ഒരു വ്യക്തിയോട് തോന്നുന്നത് സ്നേഹമാണോ ആകർഷണമാണോ?