നേരം

ഒന്നിനും നേരമില്ലെന്നു ചൊല്ലാനും
തെല്ലു നേരമില്ലാതെ പോവുന്ന കാലം
നേരത്തിൻ പൊരുൾ തേടീടുവാൻ
നേരവും കാലവും ഇല്ലാതെപോയോർ
നേരു ചൊല്ലാൻ തുലോം നേരമില്ലെങ്കിലും
നെറികേടു വാഴ്ത്താൻ നേരമുണ്ടാക്കിടുന്നു
ബന്ധുത്വം കാക്കാൻ പരസ്പരപൂരക
വാത്സല്യകൂടൊരുക്കി കുശലമേകാനും
കനിവുതേടുവോരുടെ കണ്ണീരൊപ്പി
കരുണയുടെ കാവ്യമോതാനും നേരമില്ലേലും
ചാറ്റിംങിൽ തുടങ്ങി ചീറ്റിങ്ങിൽ കുടുങ്ങാൻ
നേരം കണ്ടെത്തുവോരേറെയുണ്ട് നാട്ടിൽ
ഇഷ്ടങ്ങളെ നേരം പോക്കായ്കാണുവോർക്ക്
കഷ്ടങ്ങൾ കണ്ടുചിരിക്കാൻ നേരമുണ്ട്
നേരമിതു നല്ല നേരമല്ലെന്ന ചിന്തയിൽ
നേരത്തെ ആട്ടിയോടിച്ച നേരംപോക്കികൾ
നേരത്തിൻ വിലയെന്തെന്നറിയുമ്പോൾ
നേരം കളഞ്ഞോരുനേരത്തെയോർത്തു കരയുന്നു.