ബെന്നി പറഞ്ഞു, ”എനിക്കൊരു സ്വപ്‌നമുണ്ട്; പറന്നു നടക്കണം”. ഇതു വായിക്കുമ്പോൾ നിങ്ങൾക്കു തോന്നും ഇയാൾക്കെന്താ ചിറകുണ്ടോ എന്ന്..?. എന്നാൽ ഉണ്ട്, വൃത്താകൃതിയിലുള്ള രണ്ടു ചിറകുകളാണവ. ആ ചിറക് ഉപയോഗിച്ചാണ് അദേഹം പറന്നു നടക്കുന്നത്. പല വഴികളിലൂടെ.. പല ദൗത്യങ്ങളുമായി…
ആദ്യകാല കുടിയേറ്റ കർഷകരായ കാസർഗോഡ് ജില്ലയിലെ മാലക്കല്ല് എന്ന ഗ്രാമത്തിലെ കൊല്ലാലപ്പാറയ്ക്കൽ ലൂക്ക-പെണ്ണമ്മ ദമ്പതികളുടെ അഞ്ച് മക്കളിൽ നാലാമനായി1973 ലാണ് ബെന്നിയുടെ ജനനം 10 ക്ലാസിന് ശേഷം തയ്യൽക്കാരനായി. ജോലിയിൽ ഇടവേളകളിൽ കണ്ടെത്തി ഡ്രൈവിംഗ് പഠിച്ചു. തയ്യൽ ജോലി കുറയുമ്പോൾ ഡ്രൈവിംഗിന് പോയി ജീവിതം പുലർത്തി. തിരക്കിട്ട ഈ ജീവിതത്തിനിടയിലും കരാട്ടെ പഠിച്ചു. ചുരുങ്ങിയ കാലംകൊണ്ട് കെൻപോ കരാട്ടെയിൽ ബ്ലാക്ക്ബെൽറ്റ് നേടി. ജീവിതം ഇങ്ങനെ സന്തോഷപ്രദമായി കടന്നുപോകുമ്പോഴായിരുന്നു ആ ഇരുണ്ട ദിനം ബെന്നിയുടെ ജീവിതത്തിലേക്ക് കടന്നുവന്നത്.
ബോധം വീണ്ടെടുക്കുമ്പോൾ മംഗലാപുരത്തെ ആശുപത്രിയിലാണ്. ചെരിഞ്ഞൊന്ന് കിടക്കാൻ ശരീരം ആവുംവിധം അനക്കി. അരയ്ക്കു മുകളിലേക്ക് മാത്രം… താഴേക്ക് ഒന്നുമില്ലാത്ത അവസ്ഥ. സുഷുമ്‌ന നാഡിക്കേറ്റ പരിക്ക് ബെന്നിയുടെ ജീവിതത്തെ അന്ന് കട്ടിലിലേക്ക്ചുരുക്കുകയായിരുന്
ചില അടുത്ത സുഹൃത്തുക്കളും വീട്ടുകാരും ബലമേകിയപ്പോൾ ജീവിതം തിരിച്ചെടുക്കുവാനുള്ള വാശി മനസിൽ രൂപപ്പെട്ടു. അവ ആദ്യം കുറിക്കപ്പെട്ടത് കവിതകളുടെ രൂപത്തിലായിരുന്നു. ഏകാന്തത അസഹ്യമാകുമ്പോൾ അതെടുത്ത് പലകുറി വായിച്ചു. ഓരോ തവണയും തിരുത്തലുകൾ കുറിച്ചു. അവസാനം കവിത പൂർണതയിൽ എത്തിയപ്പോൾ വീടിന്റെ നാലു ചുവരുകൾ വിട്ട് വീൽചെറുമായി പുറത്തേക്കിറങ്ങാൻ തീരുമാനിച്ചു.
വീൽചെറുമായി എത്തിപ്പെട്ടത് പഴയ തട്ടകമായ മാലക്കല്ല് ടൗണിൽ തന്നെ. അവിടെ ഒരു തയ്യൽ കട തുടങ്ങി. പഴയ കരാട്ടെ സുഹൃത്തുക്കൾ പ്രദർശന മത്സരം നടത്തി പിരിച്ചെടുത്ത പണം ഉപയോഗിച്ചാണ് കട തുടങ്ങിയത്. അതുകൊണ്ട് കടയ്ക്ക് പീപ്പിൾസ് ടൈലറിംഗ് ഷോപ്പ് എന്ന് പേരിട്ടു. ഒറ്റമുറി പകുത്തെടുത്ത് കടയും വീടുമാക്കി രൂപാന്തരപ്പെടുത്തി. അങ്ങനെ വീൽചെയറിൽ പറന്നുനടന്ന് പുതു ജീവിതത്തിൽ പിച്ചവെച്ചു. വീൽചെയറിൽ ഓടിനടന്ന് ഭക്ഷണം വയ്ക്കുകയും തയ്യൽ ജോലികൾ ചെയ്യുകയും മുറിയോട് ചേർന്നുള്ള ബാത്ത്റൂമിൽ അലക്കുകയും ചെയ്യുന്ന ബെന്നി നാട്ടുകാർക്ക് അത്ഭുതമായി മാറുകയായിരുന്നു.
പുതു ജീവിതം തുടങ്ങി പന്ത്രണ്ടാം വർഷം ബെന്നി മാലക്കല്ല് ടൗണിൽ അഞ്ചു സെന്റ് സ്ഥലം വാങ്ങി. ഏഴു വർഷത്തിനപ്പുറം അദേഹം തന്റെ അഞ്ചു സെന്റ് സ്ഥലത്ത് 2,400 ചതുരശ്ര അടി വലിപ്പമുള്ള ഇരുനിലക്കെട്ടിടം പണികഴിപ്പിച്ചു. അതിൽ ഒരുനില തന്റെ വീടും ഇടവുമാക്കി. മറ്റേ നില വാടകയ്ക്ക് നൽകി. ഏകദേശം 40 ലക്ഷത്തോളം രൂപ മുതൽമുടക്കിലാണ് കെട്ടിടം പണിതത്. ബാങ്ക്, കെഎസ്എഫ്ഇ എന്നിവിടങ്ങളിൽ നിന്നും മറ്റും ലോണെടുത്തും തന്റെ വർഷങ്ങളുടെ സമ്പാദ്യം ഉപയോഗിച്ചുമാണ് ഈ സ്വപ്നസൗധം ബെന്നി പണി കഴിപ്പിച്ചത്.
വെല്ലുവിളികളിൽനിന്നും സ്വന്തം ജീവിതം പണിതുയർത്തുമ്പോഴും സമാന ജീവിതങ്ങൾക്കു സാന്ത്വനമേകാൻ ബെന്നി പരിശ്രമിച്ചു. തിരക്കുകൾക്കിടയിലും ആശ്രയമാവശ്യമുള്ളവരെ അന്വേഷിച്ചു ചെന്നു. അവരുടെ പ്രശ്നങ്ങളെക്കുറിച്ച് മനസിലാക്കി. അവർക്കു സാന്ത്വനമേകി. ഈ യാത്രയ്ക്കിടയിലും എല്ലാവരുടേയും ഒരു കൂട്ടായ്മയായിരുന്നു മനസിൽ. ആ പരിശ്രമത്തിന് അവസാനം ഉത്തരമായിരിക്കുന്നു. സിയാൽ എന്നാണ് ആ സംഘടനയുടെ പേര്. സ്പൈനൽ കോഡ് ഇൻജുറീസ് അസോസിയേഷൻ ഫോർ ലൗ ആന്റ് ലൈവ് എന്ന് പൂർണരൂപം. ബെന്നിയുടെ നേതൃത്വത്തിൽ സമാന മനസ്‌കരായ കുറച്ചുപേർ കൂടി ആരംഭിച്ച സംഘടന. ഈ സംഘടനയുടെ ബാനറിൽ രണ്ടു സംഗമങ്ങൾ ഇതുവരെ നടത്തി. ഒരു രാത്രിയും ഒരു പകലും എല്ലാവരും ഒരുമിച്ച് സന്തോഷവും സ്വപ്നങ്ങളും അവർ പങ്കിടുന്നു. രണ്ടു സംഗമങ്ങളിലും 30 മുകളിൽ അംഗങ്ങളുടെ പ്രാതിനിധ്യമുണ്ടായിരുന്നു. കൂടാതെ വീൽചെയർ ജീവിതങ്ങളുടെ സംസ്ഥാന സംഘടനയായ ഓൾ കേരള റൈറ്റ്സ് ഫെഡറേഷന്റെ സ്ഥാപക ഭാരവാഹിത്വവും വഹിച്ചു.
ബെന്നിയുൾപ്പെടെ സമാനമനസ്‌കരുടെ സംഘം വോയ്‌സ് ഓഫ് ഡിസേബിൾ എന്ന പേരിൽ സംഘടന രൂപീകരിച്ച് പ്രവർത്തനം ആരംഭിച്ചിരിക്കുകയാണ്. ഇക്കഴിഞ്ഞ വികലാംഗ ദിനത്തിൽ സംഘടനയുടെ നേതൃത്വത്തിൽ അവകാശ സംരക്ഷണമെന്ന മുദ്രാവാക്യമുയർത്തി കേരളമാസകലമുള്ള ഭിന്നശേഷിക്കാരെ സംഘടിപ്പിച്ച് സെക്രട്ടറിയേറ്റിലേക്ക് വീൽചെയർ റാലി നടത്തുകയും മന്ത്രിമാർക്കുൾപ്പെടെ നിവേദനം നൽകുകയും ചെയ്തതു. മോട്ടിവേഷൻ സ്പീക്കറായും ബെന്നി തിളങ്ങുന്നുണ്ട്. ഫോൺ-8547544111.
മായ വിനിൽ