ഫ്ലാസ്ക് വൃത്തിയാക്കാന്‍ പഴയ ന്യൂസ് പേപ്പര്‍ ചെറിയ കഷ്ണങ്ങളാക്കി കീറിയിട്ടു മീതെ ഇളംചൂടുള്ള വെള്ളമൊഴിച്ച് ഫ്ലാസ്ക്ക് അടച്ചു നന്നായി കുലുക്കുക. പിന്നീട് തണുത്ത വെള്ളത്തില്‍ കഴുകുക. ഫ്ലാസ്ക്കിന്റെ ഉള്‍വശം നന്നായി വൃത്തിയായി കിട്ടും.
· ഗ്യാസ് സ്റ്റോവ് ബര്‍ണറുകളിലെ ദ്വാരങ്ങള്‍ വൃത്തിയാക്കാന്‍ നൂലില്‍ സൂചി കോര്‍ത്ത് ഓരോ ദ്വാരത്തില്‍ കൂടെയും കടത്തിയാല്‍ മതി.
· സ്റ്റീല്‍ പാത്രങ്ങള്‍ക്ക് മങ്ങലാണോ? കറിയ്ക്ക് പിഴിഞ്ഞ പുളിയുടെ ചണ്ടി കൊണ്ട് തേച്ചാല്‍ മതി, പാത്രങ്ങള്‍ നല്ലപോലെ വൃത്തിയാകും.
· കണ്ണട വൃത്തിയാക്കുമ്പോള്‍ പോറലുകള്‍ വീഴാതിരിക്കാന്‍ വൃത്തിയാക്കുന്നതിനു മുമ്പേ ഒരു തുള്ളി വിനാഗിരി ചില്ലുകളില്‍ ഒഴിച്ച് തുടയ്ക്കുക.
· കറ പിടിച്ചു ചായപ്പാത്രം അഴുക്കായി എങ്കില്‍ പാത്രത്തില്‍ വെള്ളം നിറച്ച് ഒരു ടീസ്പൂണ്‍ സോഡാപ്പൊടി ഇട്ടു ഒരു മണിക്കൂര്‍ വെക്കുക. എന്നിട്ട് നന്നായി കഴുകി എടുക്കുക. പത്രം പുത്തന്‍ പോലെ തിളങ്ങും.
· നനഞ്ഞ തുണിയില്‍ അല്പം ഉപ്പു വിതറി അലുമിനിയം ജനല്‍ ഫ്രെയിം തുടച്ചാല്‍ നല്ല തിളക്കം ലഭിക്കും.
· ഫര്‍ണിച്ചറുകളില്‍ പേപ്പര്‍ ഒട്ടിപ്പിടിച്ചാല്‍ അല്പം എണ്ണ പുരട്ടുക. അല്‍പസമയം കഴിഞ്ഞു തനിയെ ഇളകി വരും.
· കുളിമുറിയിലെ തറയില്‍ പാടുകള്‍ വീണോ? എങ്കില്‍ ആദ്യം നാരങ്ങാനീരും, ഉപ്പും ചേര്‍ന്ന മിശ്രിതം പാടുള്ള ഭാഗത്ത് ഒഴിക്കുക. പത്ത് മിനിട്ടിനു ശേഷം ഒരു കപ്പ്‌ ചൂടുവെള്ളത്തില്‍ ബ്രഷ് മുക്കി ഉരച്ചു, മൃദുവായ തുണി കൊണ്ട് തുടച്ചാല്‍ പാടുകള്‍ പോയി കിട്ടും.
· അല്പം പെട്രോളിലോ, സ്പിരിറ്റിലോ മുക്കിയ തുണി കൊണ്ട് തുടച്ചാല്‍ മാര്‍ബിള്‍ തറയിലെ പാടുകള്‍ വൃത്തിയാക്കാന്‍ സാധിക്കും.
